الهاتف:
01225522706 - 01222224501 - 035570985
العنوان:
260 برج عباد الرحمن - الملك حفني اعلي بن الخشاب سيدي بشر بحري
حوار: هبه حاتم
تحدث الكابتن محمود شاكر عبدالفتاح نجم المصري البورسعيدي السابق في حوار خاص ل “جولدن تيم”، عن مواجهة الزمالك والمصري في كأس الكونفدرالية الإفريقية، التي تحمل في طياتها الكثير من الحماس والإثارة، خاصة مع تاريخ كبير وحافل يجمع بين الفريقين.
وكيف يرى الكابتن محمود مواجهة المصري أمام الزمالك؟ وما هي نقاط القوة والضعف التي قد تحسم هذه المباراة؟ وهل يمكن للمصري أن يسطر تاريخًا جديدًا على الساحة الإفريقية؟
كل هذا وأكثر، في موقع “جولدن تيم”، وحديث شيق يكشف لنا الكواليس والآراء الفنية لأحد رموز الكرة البورسعيدية.
س/إيه نقاط القوة اللي بيعتمد عليها المصري في مواجهاته مع الفرق الكبيرة زي الزمالك؟
المصري بيعتمد على روح جماهيره القوية اللي دايمًا بتدعمه، وعلى تاريخه الكبير كنادي عريق. بجانب ده، الفريق في الوقت الحالي بيعتمد على التماسك بين اللاعبين والجهاز الفني، ودعم مجلس الإدارة اللي بيدفع الفريق للأمام بثقة.
س/شايف إن عامل الأرض والجمهور فارق معاكم؟
أكيد عامل الجمهور والأرض ليهم تأثير كبير، لكن للأسف المصري محروم من ملعبه في بورسعيد، وده أثر كتير على الفريق لأنه بيفقد أكتر من 50% من قوته الحقيقية. اللعب في ملعبنا وبين جمهورنا مختلف تمامًا، لكنه مش متاح دلوقتي.
س/إيه الخطة اللي هيعتمد عليها علي ماهر لإيقاف مفاتيح لعب الزمالك؟
الخطة هتكون بإغلاق المساحات على لاعبين مؤثرين زي زيزو وعبد الله السعيد، مع فرض رقابة لصيقة عليهم. الهدف هو منعهم من استلام الكرة في مناطق خطيرة أو التحرك بحرية.
س/إيه الرسالة اللي تحب توصلها لجماهير المصري قبل ماتش مهم زي ده؟
أقول لجماهير المصري: “أنتم روح الفريق وسلاحه الأول، وجودكم ودعمكم سواء في الملعب أو من بعيد هو اللي بيدفع الفريق لتقديم أفضل أداء، ودايمًا خليكم في ظهرنا مهما كانت الظروف”.
س/فيه لاعيبة معينة شايف إنها مفتاح الفوز في الماتش ده؟ وإزاي الجهاز الفني بيحفزهم؟
أكيد فيه لاعبين مؤثرين زي صلاح محسن، دغموم، الشامي، وعمرو سعداوي اللي بيقدم مستويات رائعة، الجهاز الفني بيحاول يحفزهم من خلال التركيز على دورهم المحوري في المباراة وإظهار الثقة في قدرتهم على تحقيق الفرق.
س/لو حصل ضغط على الفريق في أول الماتش، إزاي علي ماهر يقدر يتعامل مع السيناريو ده؟
علي ماهر هيعتمد على التوازن في البداية وقراءة الخصم كويس. لو حصل ضغط، هيحاول يهدّي اللعب ويعتمد على الهجمات المرتدة لاستكشاف نقاط ضعف الزمالك واستغلالها.
س/شايف المنافسة على البطولة صعبة ولا فرص المصري كبيرة؟
المنافسة مش سهلة، لكن المصري أثبت إنه فريق قوي ضد الزمالك في مواجهاته الأخيرة. لو استمر الأداء القوي واستغل الفرص بشكل صح، فرصه هتكون كبيرة.
س/هل فيه تركيز على أي نقاط ضعف في الزمالك واستغلالها خلال الماتش؟
طبعًا، التركيز هيكون على نقاط الضعف خصوصًا في خط الدفاع اللي ممكن يتم استغلاله بالضغط السريع، بالإضافة إلى تضييق الخناق على مفاتيح لعبهم زي زيزو.
س/التشكيل المناسب للمصري الماتش ده؟
التشكيل الأفضل هيكون بمشاركة صلاح محسن في الهجوم، دغموم في الوسط، وسعداوي على الجهة اليسرى، مع خط دفاع صلب لتأمين المباراة والتوازن بين الدفاع والهجوم.
س/إيه الأخطاء اللي لازم المصري يتجنبها وإزاي يتم تصحيح الأخطاء اللي بتظهر في المباريات؟
الأخطاء اللي لازم يتجنبها المصري هي التراجع الدفاعي الزايد وضياع الفرص السهلة. التصحيح بيكون من خلال تركيز اللاعبين في اللحظات الحاسمة، والتواصل الجيد بين الخطوط أثناء المباراة.
واستكمل الحديث: النادي المصري في المباراة دي بيحتاج للفوز بشدة، لكن في نفس الوقت الدفاع لازم يكون قوي وما يستقبلش أهداف. أعتقد إن الكابتن علي ماهر هيبدأ بخطة متحفظة شوية في الأول، عشان يقيم الوضع. زي ما بيقولوا، “جس النبض” يشوف شكل المباراة، حالة اللاعبين، واستراتيجية الفريق المنافس. هل الفريق اللي قدامه قلقان، متحفظ، أو مش في أفضل حالاته؟ لو حس إنهم مش في الفورمة، ممكن يبدأ يضغط عليهم ويستغل نقاط الضعف اللي تظهر مع الوقت.
أكمل: كلامي هذا من منطلق إني لاعب سابق في النادي المصري ونادي الزمالك، وطبعًا الزمالك نادي كبير جدًا وغني عن التعريف، مش أنا اللي أقدر أتكلم عن نادي بحجمه وتاريخه، وإن شاء الله ربنا يكتب الخير للجميع.
وأخيراً “نجم من ذهب.. بين الأمس واليوم”، في عالم كرة القدم، هناك أسماء تظل محفورة في ذاكرة المشجعين، ليس فقط بفضل إنجازاتهم داخل المستطيل الأخضر، بل بروحهم القتالية وحبهم للشعار الذي يحملونه، ومن بين هذه الأسماء البارزة، الكابتن محمود شاكر، نجم النادي المصري البورسعيدي السابق.
